ILOILO CITY – Suno sa late American actress nga si Cicely Tyson, “Challenges make you discover things about yourself that you never really knew”.
Apang, mga Ka-Bombo, dapat man siguro nga pili-on mo kun ano ang sahi sang mga challenges ang imo atubangon.
Basi magpareho ka sa isa ka lalaki sa China nga ginderetso sa emergency room sa Zhejiang hospital nga may screw base sang bombilya nga naga-ungot sa iya nga baba.
Ini matapos nga gin-testingan niya ang isa sa mga ginatawag nga dumbest online challenges.
Ang lalaki nga si Mr. Chen ang personal nga nagpadulong sa Yuyao City Fire and Rescue Brigade sa Zhejiang, China agud nga magpangayo sang bulig bangud sang naga-ungot nga LED light bulb sa iya baba.
Napaslawan ang mga bombero sa pagkuha sini sa iya baba gani nga gindala nalang ini sa Yuyao People’s Hospital.
Ini ma-open ni Mr. Chen ang iya baba gani indi man makuha ang light bulb.
Bangud sini, naggamit pa sila sang special mouth opener agud nga ma-dislocate ang bahin sang iya sag-ang kag makuha ang glass bulb.
Ginpahayag ni Chen nga nag-ungot ang bombilya sa iya baba duha ka oras ang nakaligad antes ini nagpangayo sang bulig.
Gintinguha-an pa niya una nga kuhaon ini apang indi niya ma-nganga ang iya baba.
Ang rason kun ngaa may bombilya sa iya baba amo nga nakita niya sa isa ka video nga may naghimo sini gani gusto niya nga testingan man.
