Gina-insister ni Atty. Jimmy Bondoc nga ang mga legal counsel kaangay niya ang dapat nga pahanugutan man nga magbaton sang arrest warrants para sa ila nga mga kliyente.
Ginhalimbawa pa sini si former senator Antonio Trillanes IV nga nagkadto gid gani sa Senado kag nagpakita sang kopya sang arrest warrant sang International Criminal Court (ICC) sang nagligad nga Lunes, Mayo 11, sang gintuyo nga arestuhon si Senator Ronald “Bato” dela Rosa.
Sang amo nga tion, ginsiling ni Trillanes nga ginatuman lamang sini ang “personal request” ni Dela Rosa bangud naakig ini sang Mayo 2024 kag ginhangkat si Trillanes nga “make my day” kag mag-upod sa ICC kag siya mismo ang magposas sa iya kun iserbe na ang arrest warrant.
Suno naman kay Bondoc, “Kapag si Trillanes, pwede mag-serve, kaming mga abogado, hindi? Matagal ko na pong sinasabi, pagdating sa foreign, unrecognized warrants, wala pang batas o applicable rules, kaya nagkakagulo.”
“Pag nagprisinta si Trillanes mag sheriff, payag kayo. Pag kami, bawal?,” dugang pa ni Bondoc.
Ini nga post ni Bondoc ang kasunod sang viral interview sa iya kun sa diin gin-insister sini nga mahimo maserbe ang arrest warrant paagi sa “personal service.”
Sang ginpamangkot siya kun paano ini mahimo bangud nalagyo naman si Dela Rosa, nagrason si Bondoc nga amo ini ang pulos kun ngaa may abogado.
“That is the purpose of the lawyer,” pahayag sini samtang ginapaathag nga pwede sila makabaton sang arrest warrants para sa ila nga client. Ginpanindugan man sini nga dapat magsunod sa proper procedures ang pagpatuman sang arrest warrant.#
