Nagapabilin sa Ukrainian boxer nga si Oleksandr Usyk ang tatlo ka heavyweight world titles matapos liwat nga ginlutos si Tyson Fury sa ginpatigayon nga heavyweight championship rematch sa Kingdom of Saudi Arabia.
Nag-skor ang tatlo ka judges sang pareho nga 116-112 pabor sa 37-anyos nga kampyon rason nga na-retain sini ang WBA (Super), WBC kag WBO titles.
Si Usyk amo man ang una nga nagpatilaw sa 36-anyos nga Briton sang mapait nga kalutusan paagi sa split decision sang ginpatigayon ang ila four-belt unification bout sang Mayo.
Apang tatlo na lamang ka mga paha — WBA, WBO, kag WBC — ang gin-agawan kahapon matapos nga ginkakas kay Usyk ang IBF title bangud mas nagtutok ini sa rematch sa baylo nga atubangon ang mandatory challenger nga si Daniel Dubois.
Bangud naman sa resulta sang sini nga rematch, nagsaka na sa 23 pro wins nga may 14 knockouts ang record sang Ukrainian fighter nga isa man ka Olympic gold medalist kag former undisputed cruiserweight champion.
Nakatapak naman ini sa record sang boxing legends nga sanday Muhammad Ali, Joe Louis kag Mike Tyson bilang undisputed heavyweight kag labing-una pa sa four-belt era.
Sa pihak nga bahin, magluwas sa duha ka sunod-sunod nga kalutusan sa kamot sang isa lang ka boksidor, gina-uyatan man sang two-time world champion nga si Fury ang 34 wins kag isa ka draw sa iya nga professional record.
PARA SA UKRAINE
Sang nagdaog si Usyk, nagselebrar ini paagi sa pag-uyat sang sabre nga iya ni Ivan Mazepa nga isa ka baganihan sang Ukrainian nationalism nga nagpakig-away batok sa Russian control sang early 1700s.
Matandaan nga nakabutang sa record ni Usyk nga naka-serbe man ini bilang soldado sa Ukraine antes ang Russian invasion sa Kyiv halos tatlo ka tuig na ang nagligad.
Gilayon naman nga ginpanginbulahan ni Ukrainian President Volodymyr Zelensky ang boksidor. Pahayag sini sa Telegram, “Victory! So important and so necessary for all of us now.”#
