ILOILO CITY- Nagpaathag ang Business Permits and Licensing Office kun ngaa subong lang natukiban sang opisina nga wala sang permit ang Malabanan Siphoning Services apisar madugay na ini nga naga-operate sa syudad sang Iloilo.
Sa interview sang Bombo Radyo kay Mr. Norman Tabud, head sang nasambit nga opisina, iya ginpahayag nga limitado lang ang resources sang talatapan kag nagasalig lang ang mga ini sa mga taskforces sang Iloilo City government agud nga matumod ang mga negosyo diri sa syudad nga naga-operate lang nga wala sang mga permits.
Suno kay Tabud, natukiban lang nga wala sang business permit ang Malabanan Siphoning Services sang ginmando sang alkalde nga tinluan kag pangkuhaon ang mga napangtapik nga mga posters sa mga poste kag mga pader sa syudad sa diin kalabanan diri ang iya sang Malabanan.
Natukiban man,suno kay Tabud nga na-base sa Metro Manila ang Malabanan Siphoning Services kag naga-operate lang sa Iloilo City paagi sa ila dummy operators.
May kaangtanan diri, ginapanawagan man sang nasambit nga opisina nga indi mag-hire sang serbisyo sang Malabanan kag i-report gilayon sa ila talatapan kun padayon nga naga-operte ang nasambit nga kompaniya.
Nahibaluan nga nagpangako ang Malabanan Siphoning Services nga indi na sila mag-operate sa syudad.
Plano sa subong sang syudad nga magtukod sang task force nga pagabug-usan sang Business Permits and Licensing Office, City Environment and Natural Resources Office, kag City Tourism office agud nga mag-check sang compliance sang mga negosyo diri sa syudad sang Iloilo.
Nagapanawagan ma ang Business Permits and Licensing Office sa mga business owners para sa scheduled renewal sang permits para sa 2020 nga magasugod sa Enero 2 tubtob Enero 20.
Magdala lang sang duly filled out form ukon declaration of gross receipts para sa 2019, brgy clearance para sa business permits kun diin nahamtang ang negosyo kag fire safety inspection certificate.
