Ginkumpirma ni Senate President Vicente “Tito” Sotto III nga may yara sang plano nga kakason siya bilang lider sang Senado.
Ginpagwa ni Sotto ini nga statement isa ka adlaw antes natalana nga botohan sang Kamara kun i-impeach ukon indi si Vice President Sara Duterte.
Suno kay Sotto, sundon niya kag itib-ong kun ano ang nakabutang sa Konstitusyon, kag kun ano man ang matabo, itugyan na niya ini tanan sa plano sang Ginuo.
“I heard. As always, I serve at the pleasure of my peers. I uphold and follow the Constitution! I leave everything to God’s plan. I trust HIS Heart!” suno sa Senate leader.
Naggwa liwat ang huring-huring nga may kudeta sang nag-resume ang sesyon sang upper chamber sang Mayo 4 matapos nga gin-aprubahan sang House Committee on Justice ang Articles of Impeachment batok kay Duterte.
May caucus naman nga ginhimo ang Senate minority bloc kun sa diin nakit-an pa gani nga nagsulod si Senator Camille Villar nga halin sa majority.
Ginaalegar nga ang nagaplano nga kakason si Sotto amo si Senate Minority Leader Alan Peter Cayetano.
Nagagwa sa huring-huring nga nga ginapangaluyagan si Senator Loren Legarda nga magbulos bilang Senate President.
Apang kumplikado ang pagkuha sang 13 ka boto agud nga maislan si Sotto subong nga wala naga-report sa Senado si Senator Bato Dela Rosa ilabi na nga may bag-o na naman nga alegasyon nga may warrant of arrest ang International Criminal Court batok sa iya.
May nagaguwa man nga mga impormasyon nga nagapang-alang-alang pa ang mag-utod nga Villar nga magsaylo sa minority ilabi na nga may kaso sila nga naangot sa alegasyon sang market manipulation, fraud, insider trading kag misleading disclosures nga naga-involve sang Villar Land Holdings Corp.
Ang nagabug-os subong sa minority bloc amo sanday Cayetano, Dela Rosa, Francis “Chiz” Escudero, Jinggoy Estrada, Bong Go, Imee Marcos, Rodante Marcoleta, Robin Padilla kag Joel Villanueva.
