ILOILO CITY- Nalakip ang Brgy. Manduawak, San Dionisio, Iloilo sa i-suspend nga proclamation sang winning Barangay and Sangguniang Kabataan election candidates.
May kaangtanan ini sa gin-aprubahan sang Commission on Elections (Comelec) nga isa ka resolusyon nga nagapahanugot sa pagsuspend sa proklamasyon sang magadaug nga kandidato nga may pending nga disqualification cases.
Nahibaluan nga may yara sang gin-file nga disqualification case ang kandidato sa pagka-punong barangay sa amo nga lugar nga si incumbent Barangay Captain Ian Guillermo batok kay former San Dionisio Mayor Peter Paul Lopez nga nagakandidato man sa pagka-punong barangay.
Ginpasaka ni Guillermo ang perpetual disqualification case batok kay Lopez bangud nga may record ang anay alkalde nga “guilty of nepotism” kag ginpapanaugan sang Office of the Ombudsman sang dismissal from service nga may forfeiture sang benefits, perpetual disqualification to hold public office kag cancellation of civil service eligibility.
Samtang, base sa Section 600 sang Comelec Resolution Number 10924, ginatugutan ang mga presiding ukon nagapamuno nga commissioner sang kada division kag ang chairman nga mag-issue sang suspensyon sang proklamasyon sang mga kandidato nga may mga pending nga kaso.
Ang memorandum ang nagatugot man sa Deputy Executive Director of Operations nga ipahibalo kag hatagan ang natungdan nga Election Officers kaag Barangay Board of Canvassers (BBOC) sang isa ka kopya sang Order of Suspension.
Ginpahayag sang COMELEC sa Office of the Clerk of the Commission nga ipahibalo sa mga respondent-candidate kag hatagan sila sang kopya sang Order of Suspension.
Samtang, ang Office of Election Officer naman ang maga-monitor sa pagpatuman sang Order of Suspension sang Barangay Board of Canvassers.
