GUIMARAS – Plano sang Local Government Unit sang Buenavista, Guimaras nga magdeklarar sang state of calamity matapos maapektuhan sang oil spill gikan sa nagtagas nga power barge sang AC Energy Corporation sa Bo.Obrero, Lapuz Iloilo City.
Sa exclusive interview sang Bombo Radyo kay Reyes, iya ginpahayag nga sa 20 ka mga coastal barangays sa Probinsya sang Guimaras nga naapektuhan sang oil spill, 16 sa mga ini ang nahamtang sa banwa sang Buenavista kag 4 lang sa banwa sang Jordan.
Sa banwa sang Buenavista, lakip sa naapektuhan sang oil spill amo ang mga barangay Montpiller, Rizal, Sto. Rosario, Magsaysay, Zaldivar, Sawang, Taminla, Dagsaan, Tacay, Getulio, San Miguel, Navalas, Bacjao, Tanag, Umilig, kag Avila kag Rizal, Hoskyn, Balcon Milleza, kag Morobuan naman sa banwa sang Jordan.
Suno kay Reyes, tuman nga naapektuhan ang mga manugpangisda sa Brgy. Getulio, Buenavista, Guimaras sa diin nagsulod ang asayte sa fish cage sang mga bangrus kag nagresulta sa kamatayon sang mga ini.
Ginpapasa naman sang alkalde sang assessment ang mga punong barangay sa ila lugar sa halit nga natuga sang oil spill.
Ang nasambit nga assessment ang i-endorso naman ni Reyes sa Sangguniang Bayan agud dalayon na sila nga makadeklarar sang State of Calamity.
