Ginpangunahan ni Iloilo City Police Office (ICPO) Director Police Colonel Wilbert Parilla ang paglunsar sang Project Tanod Lead agud nga mapasangkad pa ang pagpatrolya sang mga pulis kag barangay tanod kag agud malikawan ang mga krimen sa syudad.
Sa interview sang Bombo Radyo kay Colonel Parilla, iya ginpahayag nga ginapili nila ang barangay nga may krimen kun sa diin maga-roving ang pulis kaupod ang tanod.
Suno pa sa director, magasugod ang roving alas otso sa gab-i kag magalawig tubtub alas dose sa kaagahon.
Pagkatapos sini, magabalik naman ang mga pulis sa ila nga mobile operations.
Pahayag pa sang director, himuon ini sa kada Byernes, Sabado, kag Domingo bangud mas madamo sang mga insidente kag krimen nga nagakatabo sa sini nga inadlaw.
Ginalauman suno kay Parilla nga makabulig ini nga aktibidad agud nga mapanubo ang numero sang mga krimen sa Iloilo City.
Nahibaluan nga nag-upod man sa launching kagab-i ang pila ka mga presidente sang Association of Barangay Captains halin sa pila ka mga distrito sang syudad.
