Naga-amat-amat na sa pag-alat kag pagpait ang tubig nga makuha sang mga pumuluyo sa mga bubon sa Barangay Legazpi Dela-Rama, City Proper.
Sa interview sang Bombo Radyo kay Punong Barangay Greg Espinosa, iya ginpahayag nga halin sang nagsugod ang tag-ilinit, nakit-an naman ang tina kag nagapula na ang tubig sa ila nga barangay.
Suno kay Espinosa, naka-request na siya sa Iloilo City Government nga hatagan man ang ila lugar sang duha ka static tank kag ginpasalig sa iya nga magaabot ini subong ukon sa masunod nga semana.
Pahayag pa sini, base sa ila pag-istoryahanay, ginpaathag sang General Services Office (GSO) nga unahon lang anay ang mga barangay nga yara na gid sa kritikal nga lebel ang suplay sang tubig.
Sa subong suno sa iya, may water tanker pa man kun sa diin nagakuha kag nagabakal ang mga residente samtang wala pa ang static tank.
Gindugang sini nga ang problema amo nga indi man maakomodar ang tanan nga mga pumuluyo, kundi makapiyan-piyan lang sa ila nga kinahanglanon.
Pahayag pa sang punong barangay, tatlo lang ang pampubliko nga bubon sa ila nga barangay apang indi naman safe ang tubig kag nagakaubos pa bangud sang tuman nga init.
Matandaan nga ang anum ka barangay nga gintumod nga yara sa kritikal nga suplay sang tubig sandig sa GSO amo ang Hinactacan sa La Paz; Calaparan sa Arevalo; kag Zamora Melliza, Veterans Village, San Jose kag Rizal Pala Pala sa City Proper.
Tag-duha ka static tank ang ginahatag sa kada nasambit nga barangay nga sarang magpondo sang 2,000 litros kada isa.
