Natukiban nga masobra sa 100 ka informal settlers sa Barangay San Pedro, Molo, Iloilo City ang nagapa-board pa sa ila nga mga puluy-an bisan nga lote sang syudad ang ila gintukuran sang ila balay.
Sandig ini sa pag-check sang Iloilo City Local Housing Office kag ginkumpirma man ni Punong Barangay Karl John Lapascua.
Sa interview sang Bombo Radyo kay Lapascua, iya ginpahayag nga may nagdangop naman sang amo man nga reklamo sa Iloilo City Boarding House Commission matapos nahibaluan nga indi man rehistrado sa ila barangay ang naga-istar sa amo nga mga balay.
Suno sa punong barangay, magakadto siya sa Iloilo City Hall kag klaruhon kun ano ang pwede mabulig agud makapahagan-hagan man sa problema sang mga pumuluyo ilabi na nga may relocation nga himuon.
Nahibaluan nga propiedad sang syudad sang Iloilo ang anum ka ektarya nga duta sa amo nga barangay. Amo ini ang natumod nga patindugan sang Iloilo Justice Complex nga amo ang maga-akomodar sang Office of the Regional Prosecutor, City Prosecutor, kag Provincial Prosecutor.
Bangud sini, ginalantaw nga maapektuhan ang mga illegal settlers nga nagapuyo malapit sa Iloilo River Esplanade nga sulod sa duta sang syudad.
Sa masobra 200 households nga yara sa area, 115 lang ang nalista nga yara sa amo nga lugar sang ginpatigayon ang citywide census sang 2024 tubtub sang 2025.
Nagalain naman ang buot sang isa ka residente nga si Jose Almas bangud pahalinon na sila sa lugar.
Suno kay Jalmas, nakasapol man sila sang una nga kun kinahanglanon na ang duta bangud sa gina-construct nga ospital, pahalinon na sila. Apang dugang niya, wala gid sang temprano nga pahibalo subong nga iga-relocate ang illegal settlers gani nga naga-panic sila kag nagaproblema bangud may yara pa sila sang mga bata.
Una na nga ginpahayag sang Iloilo City Local Housing Office nga iga-relocate ang illegal settlers antes matapos ang 2026.#
