Nagbilin sang dako nga halit ang buhawi sa pila ka bahin sang siudad sang Iloilo, pasado alas-10 kagab-i, Agosto 8.
Ini matapos nga na-uklab ang pila ka mga puno, nagtalabug ang mga gamit sang food vendors, naguba ang mga poste sang kuryente, kag narumpag naman ang pila ka mga pwesto sang Ukay-ukay vendors sa pila ka bahin sang siudad.
Lakip sa naka-eskperyensya sang nasambit nga buhawi amo ang distrito sang Mandurriao kag distrito sang Jaro.
Isa sa mga nakaagum sang pilas sa insidente amo ang babayi nga estudyante nga natumbahan sang puno samtang nagalakat ini sa Jaro plaza.
Suno sa estudyante, nagabantay sya sang traysikol sang natabo ang insidente.
Gilayon man ini nga ginbulong sang mga responders nga nakabantay sa lugar.
