Nagpaguwa ang Civil Aviation Authority of the Philippines (CAAP) sang Notice to Airmen (NOTAM) kaangot sa satellite launch sang North Korea.
Suno kay CAAP spokesperson Eric Apolonio, gin-isyu ang notice sa tanan nga commercial pilots agud malikawan ang airspace nga nagapalibot sa North Korea, South Korea, kag eastern Japan.
Ginpahayag sini nga isa ini ka safety precaution kag nakahibalo na ang commercial airlines sang aviation safety protocol.
Base sa sini nga notice, ginadumilian ang pilots nga magsulod sa apektado nga airspace bangud sa testing sang North Korea halin 8:00 a.m. sa Myerkules.
Una na nga ginpahayag sang North Korea nga yara na ini sa final preparations sa paglunsar sang kumpleto nga military spy satellite.
Una na nga nag-inform ang North Korea sa Japanese coastguard nga may ipalupad nga rocket sa tunga sang Mayo 31 kag Hunyo 11 kag magatupa ini sa tubig malapit sa Yellow Sea, East China Sea kag east sang Luzon Island sa Pilipinas.
Nakahanda na ang missile defenses sang Japan kag nagpahayag pa ang gobyerno nga i-shoot down sini ang missile sa tion nga magsulod sa ila airspace.
Nahibaluan nga ginpabaskog pa sang North Korea ang ila nga missile launches halin sang nagligad nga binulan rason nga may emergency warning systems sa pila ka bahin sang Japan.#
