Patigayunon sa Western Visayas subong nga adlaw, Abril 15, ang regionwide protest caravan nga kabahin sang panawagan sang mga transport groups nga indi pagdayunon ang compulsory consolidation kaangot sa Public Utility Vehicle Modernization Program (PUVMP).
Sa interview sang Bombo Radyo kay Mr. Elmer Forro, lead convenor sang NO TO PUV Phaseout Coalition kag Secretary General sang Bayan- Panay, iya ginpahayag nga dululungan nga patigayunon ang caravan sa Bacolod City kag Iloilo City kag iban nga parte sang Panay.
Suno kay Forro, kalabanan sa mga magaintra sa caravan amo ang mga operators nga na-scam bangud nga ginpasalig sila nga ma-consolidate apang ginpabay-an lamang sang mga kooperatiba. Magaupod man suno sa iya ang nagapamatok sa Local kag Provincial Local Public Transport Route Plan (LPTRP) bangud ginapatihan nga naga-signal man ini sang total phaseout sa traditional nga mga jeep.
Ginklaro ni Forro nga indi makaupod ang Iloilo sa Samahang Manibela Mananakay at Nagkaisang Terminal ng Transportasyon (MANIBELA) kag Pagkakaisa ng mga Samahan ng Tsuper at Opereytor Nationwide (PISTON) sa ila nga duha ka adlaw nga transport strike ukon untat-byahe bangud base sa konsultasyon, ginapahog sang kalabanan nga mga kooperatiba ang ila mga myembro.
Dugang niya, wala sang rason nga dayunon ang mandatory consolidation bangud pila ka beses man ini nga na-extend,wala man sang nagbag-o sa sentimento sang mga ordinaryo nga operators kag drivers kag labi pa nga nabuyagyag ang mga eskandalo kag isyu nga nakapalibot sa modernization program.
Nahibaluan nga gintalana ni Presidente Marcos sa Abril 30 ang deadline sang franchise consolidation sang public utility vehicles kag wala na sang ihatag nga extension.#
