ILOILO CITY – Nagapati ang isa ka Ilonggo nga Carlos Palanca Memorial Awards for Literature Hall of Fame Awardee nga nagakadapat kuntani nga ipatuman ang academic freeze subong nga pandemya.
Sa interview sang Bombo Radyo kay Peter Solis Nery, poet, fictionist, author, kag filmmaker, iya ginpahayag nga madamo sang mga sala ang Department of Education (DepEd) sa pagpatuman sang distance ukon blended learning sa diin ginlaragway niya nga ‘crime against children’ ang ginhimo sang ahensya.
Ginpahayag sang natungdan nga nagabinuang na ang mga estudyante sa subong, ang mga ginikanan ang indi makahibalo mag ‘manage’ kag ang mga manunudlo ang ‘ill equipped’ ukon kulang ang eksperyensya kag preparasyon.
“Kun gamiton ko ang word nga krimen, naga-react ang mga tawo. So amo na hambal ko nga crime againts children, kay nagabinuang ang mga estudyante subong. Ang mga ginikanan, indi man makahibalo mag-manage tapos ang mga teachers are ill-equipped,” pahayag ni Nery.
Panugyan ni Nery, mas maayo kuntani nga ginpa-untat na lang ang klase kag maayo nga magtuon na lang anay sang lain nga bagay sa diin maayo nga halimbawa suno sa natungdan amo ang pagtanom sang kamote agud mangin produktibo nga pumuluyo.
“Sa akon ya sang nagsugod ang ini nga istorya, nagasulod sa ulo ko, go for academic freeze. Buot silingon, wala lang ya anay klase eh. Kay pwede man ya nga ang mga bata, sa isa ka tuig, ara lang sa ila balay, kun ano lang to ang tun-an nila. Magtanom sila sang kamote to be productive citizen. Galing kay nagpasaga-saga kita, nga magsugod sa sining distance learning, mga pobre man kamo wala man kamo internet,” dugang pa ni Nery.
Dugang pa ni Nery, ang mother toungue-base multi-lingual education ang indi dapat pag-ipatuman sa math ukon science bangud mas mabudlayan ang mga kabataan nga mag intindi sang nasambit nga asignatura kun lokal nga lengwahe ang gamiton.
Nagapati naman ang natundgan nga sa subong, natapos na ang tyempo sang mga manunudlo nga terror kag mga nagabaton sang mga regalo kaangay sang tsokolate kag bulak.
