Naghugyaw ang delegasyon sang Pilipinas bangud nagdaku ang tyansa nga makadala gid sang INDI LANG ISA KUNDI TATLO GID ka medalya ang Golden Boy sang pungsod nga si Carlos Edriel Yulo ukon si Caloy Yulo matapos ini nag-abanse na sa finals sa tatlo ka kategorya sa gymnastics tournament sa Paris Olympics 2024!
Base sa Paris Olympics website nga ginpaguwa pasado ‘las tres sa kaagahon oras sa Pilipinas, kumpirmado nga kuwalipikado ang Pinoy gymnast sa medal rounds sang all-around event, vault, kag floor exercise.
Nakaangkon si Yulo sang total score nga 83.631 sa qualification round agud nga makatapak sa finals.
Nahibaluan nga top 24 gymnasts lamang ang nag-abanse sa amo nga -around finals.
Sa floor exercise, nangin impresibo ang hulag ni Yulo kag nakaangkon sang skor nga 14.766 sa qualification round kag nagpangaduha sa tiglawas sang Great Britain nga si Jake Jarman nga may 14.966.
Sa vault apparatus, nakakuha ini sang average nga 14.683 sa qualifiers kag nagpang-anum sa pangkabug-usan.
Ginpahayag sang Filipino gymnast nga may yara pa siya sang inughatag nga mas impresibo nga performance sa qualification apang wala sini anay ginbubo ang tanan bangud mas ginhatagan sini sang prayoridad ang safety kag nagahalong nga indi makaangkon sang injury samtang yara na sa all-around finals.
Kun balikan ang performance sini sa Tokyo Olympics sang 2021, nag-abanse man anay si Yulo sa vault finals apang wala nakabusa sang medalya. Siya man ang gold medalist sa amo nga apparatus sa 2021 World Championships.
Balantayan ang all-around finals sa Hulyo 31; ang floor exercise finals sa Agusto 3; kag ang vault finals sa Agusto 4.
Subong nga adlaw, sa gymnastics sa gihapon, balantayan ang iban pa nga tiglawas sang Pilipina nga sanday Emma Malabuyo, Aleah Finnegan, kag Levi Ruivivar.
