Iloilo – Ginkakibot sang cause oriented groups ang pagdeklarar ni Presidente Ferdinand “BongBong” Marcos Jr. subong nga adlaw sang Pebrero 24 bilang special non-working holiday agud dumdumon ang Epifanio de los Santos Avenue ukon EDSA People Power Revolution.
Suno sa Proclamation No. 167, ginsaylo ni Marcos ang holiday sa Pebrero 24 agud nga maka-avail sang benepisyo sang mas malawig nga weekend ang mga pumuluyo.
Bwas naman nga amo ang matuod nga anibersaryo ang gindeklarar naman bilang regular working day.
Matandaan nga ika-37 nga anibersaryo sang maragtason nga EDSA People Power Revolution ang ginadumdom sa kada Pebrero 25 nga adlaw.
Sa interview sang Bombo Radyo kay Mr. Elmer Forro, chairperson sang Bayan Panay, isa ka sahi sang pagpang-sabotahe ang ginhimo sang administrasyon agud gamay lang ang maka-upod sa pag-komemorar sang anibersaryo sang EDSA People Power Revolution.
Sa pihak sini suno kay Forro, nagapabilin sa gihapon ang panindugan sang mga pumuluyo nga ikabuhi ang natabo sang nagligad agud kuhaan sang leksyon sa subong nga henerasyon.
Kaangot sa kahiwatan, may ginhiwat naman sila nga programa sa atubang sang Iloilo Provincial Capitol sa diin tema amo ang, “Padayon ang paghimakas kag indi pa tapos ang laban ng EDSA People Power 1”.
