ILOILO CITY- Gin-athag sang pinuno sang City Drug Enforcement Unit nga apisar nag-surrender na sa Iloilo City Police Office ang nakapalagyo nga subject sa drug buy-bust operation kahapon nga adlaw sa Zone 13, Barangay Calaparan, Arevalo, Iloilo City, indi nila ini mahimo nga mapreso.
Sa interview naman sang Bombo Radyo kay Police Lieutenant Colonel Antonio Benitez Jr., pinuno sang nasambit nga unit, iya ginpahayag nga apisar indi nila mapreso ang subject nga si Sandy Duremdes, pasakaan sa gihapon ini sang kaso nga paglapas sa Republic Act 9165 ukon Comprehensive Dangerous Drugs Act of 2002.
Suno naman kay Benitez, kahapon sang ila gin- untat ang hot pursuit operation kag didto niya nga gin- istorya ang mga barangay officials nga kun luyag sang subject nga mag-surrender, ginpasalig niya nga wala sang may matabo sa iya kag natigayon subong nga adlaw ang pagsurrender ni Duremdes.
May kaangtanan naman sa pagpanginwala ni Duremdes nga nalagyo ini kahapon kag yara lang siya sa balay sang iya abyan nga nagakatulog bangud nahubog ini, ginpahayag ni Benitez nga ang makatilingalahan amo nga apisar maid-id nila nga ginpangita ang subject sa hot pursuit operation, wala gid sang bisan isa nga nakatudlo kun sa diin ini nahamtang kun matuod gid man nga nagakatulog lamang ini.
Samtang, gindugang naman ni Benitez nga magluwas sa kaso sa iligal nga druga, gina-validate man nila ang kaso nga murder nga ginpasaka sadto kay Duremdes kag sa iban pa nga posible krimen nga nahimo sini sadto.
Nahibaluan nga si Duremdes, ginakabig nga street- level individual, ang yara sa watchlist sang Philippine National Police kag yara man sa listahan sang Barangay Anti- Drug Abuse Council.
