Nagsugtanay ang Israel kag Hamas militants nga palawigon pa sang duha ka adlaw ang ceasefire — buot silingon, buhi pa ang paglaum nga mas madamo pa nga bihag ang sarang mahilway lakip na ang isa ka Pinay nga si Noralyn Babadilla nga ginapatihan nabilin gihapon sa Gaza.
Gin-anunsyo ini sang Qatari kag Hamas mediators kadungan sang ika-apat nga adlaw sang nauna na ginkasugtan nga humanitarian ceasefire sa tunga sang duha ka grupo.
Mohammed Hajjar/AP
“The State of Qatar announces that, as part of the ongoing mediation, an agreement has been reached to extend the humanitarian truce for an additional two days in the Gaza Strip,” pahayag ni Qatari foreign ministry spokesman Majed Al Ansari.
Una na nga ginpahayag sang Israel nga mapasugot ini nga i-extend sang isa ka adlaw ang ceasefire sa kada 10 ka bihag nga hilwayon sang militante nga grupo.
Sunod nga ginkumpirma sang Qatar nga nagpasugot ang Hamas sa duha ka adlaw nga extension sa idalom sang amo man nga kondisyon.
Apang paandam sang Israel, nagapabilin ang ila nga misyon nga pulbuson ang tanan nga ikasarang sang Hamas kag tapuson na ang ila nga 16 ka tuig na paghari sa Gaza sa Palestine.
Ginalantaw nga sa sini nga statement sang Israel, pasangkaron pa ang ila nga ground offensive halin sa northern Gaza padulong sa nabagatnan kun sa diin nagatumpok ang linibo ka mga sibilyan.
Nahibaluan nga sa nagligad nga mga adlaw halin sang ginpatigayon ang ceasefire, 58 na ka mga hostages ang ginbuy-an sang Hamas lakip na ang 39 ka Israelis kag nalakip man ang isa ka Pinoy caregiver.
Bilang kabaylo, may 117 naman ka Palestinian detainees nga ginbuy-an ang Israel halin sa ila nga mga presuhan.#
