Nadala na ang negosyante nga si Cedric Lee sa New Bilibid Prison (NBP) sa Muntinlupa, Mayo 3, agud magsugod sa iya sentensya matapos nga na-convict sa kaso nga serious illegal detention for ransom nga ginpasaka sang TV host kag comedian nga si Ferdinand “Vhong” Navarro.
Reclusion perpetua ang sentensya kay Lee amo man sa model nga si Deniece Cornejo nga subong yara sa Correctional Institution for Women.
Ginpahayag ni Lee nga wala na siya nakulbaan bangud naagyan na niya ini sang na-detain sa Taguig City Jail tubtub sang September 2014. Na-release siya anay sang ginpa-pyansa sang Taguig court.
“Tumaas lang ang BP ko kasi napuyat ako kagabi. “Ako? Pahinga muna. Recharge. Bahala na mga lawyers ko,” kabahin sang pahayag sini sang nadala na sa Bilibid.
Sa pihak nga bahin, ginkumpirma man sang Bureau of Corrections nga nadala naman si Deniece Cornejo sa Correctional Institution for Women.
Pareho nga 40 ka tuig nga pagka-preso ang sentensya kanday Lee, Cornejo, kag duha ka iban pa nga respondents kag ginmanduan man nga magbayad sang P300,000 sa civil indemnity kag moral kag exemplary damages.#
