Nagpasalig si Senate President Juan Miguel Zubiri nga dal-on sang Senado sa Luzon, Visayas, kag Mindanao ang hearings sa ginaduso nga Charter change (Cha-cha) kasunod sang nasapubliko nga resulta sang survey kun sa diin nakasaad nga kadam-an sang mga Pinoy ang nagapati nga indi ini ang husto nga tyempo agud nga amyendaran ang 1987 Constitution.
Suno kay Zubiri, wala ini ginadalian kag ginatun-an sang maayo agud nga mahibaluan man ang pulso sang publiko kun kinahanglan gid man nga islan ang Konstitusyon.
Base sa latest nga Pulse Asia survey result, walo ka porsyento lamang sang adult Filipino respondents ang nagapabor sa amendment sa Constitution samtang 88 percent ang nagapati nga indi ini pagtandugon.
Kuatro porsyento naman ang wala pa nakadesisyon kaangot sa amo nga isyu.
Nahibaluan nga ang Senado man ang nagapanguna sa diskusyon sa economic cha-cha kasunod sang mandu halin mismo kay President Ferdinand “Bongbong” Marcos Jr. nga i-review sang upper chamber ang proposals agud nga ma-amyendahan ang pila ka probisyon sa Constitution.#
