ILOILO CITY- Dismayado ang chairman sang Committee on Tourism sang City Council sa ginhimo sang abyan sini nga vlogger nga namuyayaw sa countdown sa Dinagyang Festival 2024.
Sa interview sang Bombo Radyo kay Councilor Rudolph Ganzon, iya ginpahayag nga wala nabinag-binag sang vlogger kun nagakaangay gid man ini nga mag-promote sang Dinagyang Festival.
Suno kay Councilor Ganzon, wala man siya sang problema sa presensya kag content sang vlogger nga ang tinutuyo nga buligan ang pag-promote sang Dinagyang Festival.
Apang suno sa iya, kuntani, mas nangin sensitibo ang mga organizers sa ila gin-imbitar nga bisita.
Sa pagtan-aw sang konsehal, maathag man nga hungod kag ginpreparahan ang pag-imbitar sa vlogger.
Dugang niya, posible nga ginpasalig man sang mga organizers ang vlogger nga saluon kag buligan ini pananglitan may magtuhaw gid man nga isyu.
Sa pagpati sang natungdan, nagaamat-amat na dula ang matuod nga essence sang Dinagyang Festival kun kasubong sini ang pamaagi sang promosyon sa kahiwatan.
Gin-athag naman sang Iloilo Festivals Foundation Inc. nga maga-cover kag magahimo lang sang content ang mga vloggers nga gin- imbitar sa 100-day countdown sang Dinagyang Festival 2024.
Sa interview sang Bombo Radyo kay Joyce Clavecillas, executive director sang Iloilo Festivals Foundation Inc., iya ginpahayag nga ang promotion sa social media lang paagi sa ila content ang engagement sang foundation sa mga vloggers kalakip na ang social media influencer nga kilala sa iya pagpamuyayaw.
Suno kay Clavecillas, natabuan lang nga bangud malawig pa ang oras antes ang programa, gin-interview sang hosts sang event ang amo nga vlogger.
Nahibaluan nga samtang gina-interview sa stage, namuyayaw ang vlogger sa presensya sang pari nga ara sa kahiwatan.
Ginakabig naman sang natungdan nga isa ka learning experience ang natabo.
