Gin-atake sang wala pa nakilal-an nga grupo ang isa naman ka panibag-o nga barko nga ginapahayag naangot man gihapon sa isa ka Israeli billionaire.
Sandig man sa nauna nga impormasyon sang kumpaniya, may nalakip nga Filipino sa crew sang barko apang indi matumod kun isahanon lamang ini ukon madamo sila nga Pinoy.
Ginhingadlan ang Liberian-flagged chemical tanker nga Central Park, may karga nga phosphoric acid, kag gina-manage sang Zodiac Maritime, isa ka international ship management company nga naka-base sa London kag kabahin sang Zodiac Group sang Israeli billionaire nga si Eyal Ofer.
(Zodiac Maritime via AP)
Natabo ang insidente sa Gulf of Aden nga napalibutan sang Yemen sa north, Arabian Sea sa east, Djibouti sa west, kag ang Guardafui Channel, Socotra kag Somalia sa south.
Sa ginpaguwa naman nga statement sang Zodiac Maritime, ginpahayag nga naulamid ang barko nga Central Park sa ginasuspetsahan nga “piracy incident” samtang nagatabok sa dagat nga 54 nautical miles ang kalayuon sa coast sang Somalia.
Pahayag pa sa amo nga statement, 22 ang crew nga sakay sa amo nga barko lakip ang Russian, Vietnamese, Bulgarian, Indian, Georgian kag Filipino nationals samtang Turkish naman ang kapitan.
Wala pa sang nag-ako kun sin-o ukon ano nga grupo ang may kahimuan sa bag-o nga insidente sa dagat nga sakop sang Middle East.
Ini ang katapusan sa serye sa mga pagpang-atake sa mga barko sa dagat sa amo nga rehiyon halin sang nagluntad ang Israel-Hamas war.
Sang nagligad nga semana, may yara man sang cargo ship nga naglabay lamang sa Red Sea apang gin-hijack sang Houthi, grupo sang mga rebelde nga naka-base sa Yemen kag suportado sang Iran. Ginpahayag gindala ang amo nga barko sa port sa Yemen. May 17 ka Filipinos sa amo nga cargo ship kag wala gihapon nahilway tubtub subong. #
(*undated photo nga ginpaguwa sang Zodiac Maritime)
