Wala naluyagan sang China ang ginhimo sang armadong-kusog sang Amerika nga pag-deploy sang Mid-Range Capability missile system (MRCS) sa Pilipinas.
Ini kaangot sa kumpirmasyon sang Armed Forces of the Philippines nga yara na sa Northern Luzon ang amo nga missile system ukon ang kilala nga “Typhon” para gamiton sang US army sa Exercise Salaknib 24 kaupod sa Philippine Army.
Ini ang labing-una nga tion nga gamiton ini nga sahi sang missile system sa Pilipinas kun sa diin pwede ang US forces makalunsar sang Standard Missile 6 kag Tomahawk Land Attack Missiles (TLAMs) sa Luzon Strait.
Ang Exercise Balikatan 2024, nga hiwaton pagkatapos sang Salaknib 24, amo ang magapakilala sang SM6 Missile System.
Makasarang ini maglab-ot sang tubtub sa 300 nautical miles ukon masobra 500 kilometers — kalayuon nga lapaw pa sa 370 kilometros nga distansya sa tunga sang pinakapunta nga bahin sang Pilipinas kag southern Taiwan.
Suno naman sa Chinese Ministry of Foreign Affairs spokesperson nga si Lin Jian, ang pagbutang sini nga missile system sa Asia Pacific ang nagapasaka pa sang tensyon sa rehiyon kag delikado ang misjudgment kag miscalculation.
Ginpanawagan man sini sa Amerika nga tahuron ang seguridad sang iban nga pungsod, likawan ang paggatong sa military confrontation, kag likawan ang pagguba sa stability kag kalinong sa teritoryo.
Dapat man suno kay Lin nga mag-aligmat ang Pilipinas kun ano gid ang ginalagas sang Amerika kag ang kunsekwensya sa pag-upod sa Amerika sa pag-deploy sini nga missile.
Una man nga ginklaro ni Balikatan 2024 Executive Agent Colonel Mike Logico nga patigayunon ang military exercises sa northern Luzon bangud malapit ini sa Taiwan, ang teritoryo nga ginaangkon sang China.
Kabahin man ini suno sa iya sa pagpreparar sa posible nga gyera.
“The purpose of an armed forces– why we exist– is really to prepare for war. There’s no sugarcoating it. That’s absolutely true… With or without China, let’s say for example in a parallel universe China did not exist, we would still be doing these exercises,” kabahin sang una nga pahayag ni Logico. #
