May barko na ang Chinese Coast Guard nga nasiplatan nga yara sa Panganiban Reef ukon Mischief Reef kahapon sang aga kag ginapanan-aw nga magabalabag pananglitan magdul-ong liwat sang suplay ang Pilipinas sa BRP Sierra Madre nga nahamtang sa Ayungin Shoal.
Base ini sa impormasyon nagikan sa maritime security expert nga si Ray Powell.
Mangin ang Armed Forces of the Philippines (AFP) ang nakabaton man sang kaangay nga report kag gina-preparar na subong ang mga soldado pananglitan masulit ang natabo nga water cannon incident sang Agusto 5 sang ginbombahan sang China sang tubig ang barko sang Pilipinas.
Suno kay AFP chief of staff General Romeo Brawner, posible nga balabagan sang China ang Pilipinas sa amo nga resupply mission paagi sa pagpadala sang madamo nga barko nga posible halin sa Coast Guard, ila nga fishing vessels, kag mangin ang ila nga maritime militia.
Wala pa sang paathag si Brawner kun paano proteheran sang militar ang mga soldado nga amo ang assigned sa pagsunod sa barko para sa resupply mission.
Pahayag sini, pananglitan may agresibo nga akto ang China, dapat nga i-obserbar gid sang Pilipinas ang tolerance kag indi magbalos. May mga water cannons man ang barko sang Pilipinas suno kay Brawner, apang wala ini ginagamit bilang pangbalos kundi ginagamit sa pagluwas sang kabuhi — halimbawa, kun may sunog sa barko.
Sandig sa dugang nga impormasyon nagikan kay Powell, nag-abot ang Chinese Coast Guard ship 3303 sa Mischief Reef kag posible magbulig man sa pagbalabag sa barko sang Pilipinas sa masunod nga resupply mission sa Ayungin. Magluwas pa ini sa maritime militia nga ginpahayag aktibo man sa amo nga area.
Ang pasalig sang AFP amo nga padayunon sang Pilipinas ang shifting sang military personnel sa BRP Sierra Madre sa Ayungin Shoal kun magbalik na ang resupply mission.
Ginpahayag man sini nga ang commissioned navy ship ang ipaidalom sa repair, kag indi pag-ibandona bangud sulod ang nahamtangan sini sa exclusive economic zone (EEZ) sang Pilipinas kag pananglitan kuhaon ini, pat-od nga okuparon na sang China ang amo nga teritoryo. #
