Gin-insister sang China nga may “gentleman’s agreement” nga natabo sa administrasyon ni anay Presidente Rodrigo Duterte kaangot sa isyu sa West Philippine Sea.
Ginsiling ini ni Foreign Ministry Spokesperson Mao Ning kadungan sang press conference kun sa diin ila liwat nga gin-akusaran ang Pilipinas nga nagasulod sa teritoryo sang China.
Ila man nga ginsulit ang ila pagpanag-iya sa Ayungin Shoal ukon ang ila ginatawag nga Ren’ai Jiao.
Ginbalikan pa sang China ang promisa sang gobyerno sang Pilipinas nga guyudon sini pahalin ang BRP Sierra Madre halin sa Ayungin; apang kun matandaan, una na nga ginpanginwala sang Malacañang nga may amo nga promisa nga nabuya ang Pilipinas.
“Second, the Philippines denies the existence of the gentleman’s agreement reached with China under the Duterte administration and has repeatedly infringed on China’s sovereignty in those waters and made provocations,” pahayag ni Mao.
Matandaan nga si former presidential spokesperson Harry Roque ang una nag-claim nga may “verbal agreement” si Duterte sa China kun sa diin nakasaad nga tubig kag pagkaon lamang ang sarang dal-on sa barko nga BRP Sierra Madre sa Ayungin Shoal.
Ginpahayag nga nagpasugot si Duterte nga indi magdala sang construction materials agud nga makay-o ang barko nga daan na bangud 1999 pa ini nabutang sa Ayungin.
Ini nga pahayag ni Roque ang ginbali naman ni former presidential adviser Salvador Panelo kag nagsiling nga wala sang kasugtanan si Duterte sa China kaangot sa amo nga isyu.
Una naman nga ginpahayag ni President Bongbong Marcos nga wala sang ihibalo ang Malacañang kaangot sa sini nga agreement bangud wala man sang ebidensya kag wala sang rekord.
Ginpatawag man sini si Chinese Ambassador to the Philippines Huang Xilian kag nagapakig-angot man sa former officials sang Duterte administration agud maathag ang amo nga bagay.#
