Gindunganan sang China ang joint drills nga ginpatigayon sang Pilipinas, Estados Unidos sang Amerika, Australia, kag Japan sa West Philippine Sea.
Suno sa People’s Liberation Army Southern Theater Command sang China, naghimo man sila sang ila kaugalingon nga joint naval kag air combat patrols sa amo man nga teritoryo.
Pahayag pa sang Beijing, “under control” ang tanan nga military activities nga nagpagamo sa sitwasyon sa amo nga kadagatan — isa ka statement nga ginakabig paglaslas sa military drills sang apat ka mga pungsod.
Ginklaro naman sang Armed Forces of the Philippines nga wala sang natabo nga kumprontasyon sa China kadungan sang ginpatigayon nga Multilateral Maritime Cooperative Activity.
Suno kay AFP spokesperson Col. Francel Margareth Padilla, natapos nila ang drills sang 4:52 kahapon sang hapon, Abril 7, kun sa diin madinalag-on nga napatigayon ang tanan nga exercises nga ila ginplano.
Gin-athag man sang Department of National Defense nga ang nasambit nga quadrilateral exercise ang nagapakita sang pag-isa sang apat ka mga pungsod, kag indi pagpakita sang pwersa batok sa China.
Gin-practice lang suno sa ahensya kun ano ang ginapahanugutan sang international law kaangay sang ginahimo sang iban nga sibilisado nga mga nasyon sa kalibutan.
Sa amo nga aktibidad, lunsay nagpadala ang Pilipinas, Japan, Estados Unidos sang Amerika, kag Australia sang naval vessels kag aircraft kaangay sang BRP Gregorio Del Pilar (PS15) nga may AW109 helicopter, BRP Antonio Luna (FF151) nga may AW159 Wildcat ASW helicopter, kag BRP Valentin Diaz (PS177) halin sa Philippine Navy; USS Mobile kag P-8A Poseidon halin sa United States Navy; Royal Australian Navy HMAS Warramunga kag Royal Australian Air Force P-8A Poseidon Maritime Patrol Aircraft halin sa Australia; kag ang JS Akebono halin sa Japan Maritime Self-Defense Forces.
Ini nga drills ang naga-demonstrar sang commitment sang apat ka pungsod nga mapabaskog pa ang regional kag international cooperation bilang suporta sa hilway nga Indo-Pacific region.
Ginhimo man ini pila ka adlaw antes ang naka-schedule nga una nga trilateral summit ni US President Joe Biden, President Ferdinand Marcos, Jr. kag Japanese Prime Minister Fumio Kishida sa Washington.#
