Nagpatigayon ang China, Iran kag Russia sang joint naval exercises sa Gulf of Oman halin Marso 15 nga magalawig tubtub sa Marso 19.
Ini nga mga pungsod nga lunsay malain ang relasyon sa Estados Unidos sang Amerika ang gina-updan man sang iban nga mga pungsod nga wala ginhingadlan sang People’s Republic of China.
Suno pa Chinese Defense Ministry, ini nga drills nga ginatawag nga 2023 edition sang “Marine Security Belt” exercises, ang magapadalom sang practical cooperation sa tunga sang navies sang tatlo ka nasambit nga pungsod.
Suno naman sa Russian defense ministry, ang active phase sang exercises ang matabo sa Marso 16-17 nga nagalakip sang nagkalain-lain nga joint maneuvers lakip na ang daytime kag night-time artillery firing.
Pahayag naman ni U.S. National Security Council spokesperson John Kirby, wala nagakabalaka ang White House sa amo nga joint training exercise.Suno kay Kirby, nagahimo man ang U.S. kag ang iban nga mga nasyon sang joint training exercises kag indi man ini ang una nga tion nga nag-train sang dungan ang mga Russians kag Chinese.
Ginpahayag man sang opisyal nga iga-monitor ini sang Amerika agud nga masigurado nga wala ini sang pamahog nga matuga sa national security interests sang Amerika ukon sa kaalyado sini nga mga pungsod.
Ginpatigayon man sang tatlo ka nasambit nga pungsod ang kaangay nga drills 2019. ##
