Nagpaandam ang China sa Pilipinas nga maghanda na sa posible nga kunsekwensya kun magpadayon ini sa pag-insister sa gusto sini sa West Philippine Sea.
Ginpahayag ini sang Beijing pila ka oras lamang matapos ginbalabagan liwat sang China Coast Guard, gin-harass, kag gingamitan na naman sang water cannon ang barko sang Pilipinas nga madul-ong man lang kuntani sang personnel kag suplay sa BRP Sierra Madre sa Ayungin Shoal.
Sa report sang foreign ministry spokesperson sang China, ila ginsiling nga ang Pilipinas ang nagsulod sa dagat nga sakop sang China ukon ang Ren’ai Jiao of China’s Nansha Qundao” nga amo ang ila tawag sa Ayungin Shoal kag sa Spratlys.
Ini ang ila rason kun ngaa ginbalabagan nila ang barko sang Pilipinas nga amo ang Unaizah May 4, ang civilian ship nga ginagamit sang Navy.
Wala pa nakumporme ang barko sang China sa pagbalabag lang kundi ginbombahan pa sang tubig ang barko sang Pilipinas nga amo man ang ila nga ginguba sa nagligad nga resupply mission sang Marso.
“The Philippines should immediately stop its infringement and provocation and refrain from undermining peace and stability in the South China Sea. If the Philippines insists on going its own way, China will continue to adopt resolute measures to safeguard its territorial sovereignty and maritime rights and interests. The Philippines should be prepared to bear all potential consequences,” suno sa Chinese foreign ministry.
Ginkumpirma naman sang National Task Force for the West Philippine Sea nga ang paggamit sang China sang water cannons ang nagtuga sang daku nga halit sa vessel kag amo man sa mga Pinoy nga sakay sini apang wala pa nadetalye kun pila ang nasamaran.
Apisar nga na-damage ang resupply ship, nadayon ang misyon sang Pilipinas kag nakalab-ot gihapon sa Ayungin Shoal kasunod sang inflatable boats nga gin-depploy sang BRP Sierra Madre.
Antes sini, nauna na si China Coast Guard spokesperson Gan Yu sa pagpaandam sa Pilipinas nga indi maghampang sa kalayo bangud suno sa iya, handa ang China nga depensahan ang ila nga teritoryo kag ila nga maritime rights kag interests.
“We warn the Philippines that playing with fire is an invitation of disgrace, and the China Coast Guard is ready at all times to defend the country’s territorial sovereignty and maritime rights and interests,” pahayag sini.
Sa Pilipinas, magasapol naman si National Security Adviser Eduardo Año kay Executive Secretary Lucas Bersamin kag sa National Security Cluster para sa mga rekomendasyon nga gusto ipalab-ot kay President Ferdinand Marcos Jr.#
