Wala ginasapak sang China ang statements sang iban nga mga pungsod nga nagpabutyag sang kahangawa bangud sa natabo na naman nga water cannon attack sa duha ka mga barko sang Pilipinas.
Matandaan nga natabo ang atake sang ginpatigayon ang food supply mission sa Bajo de Masinloc ukon sa Panatag Shoal ukon sa Scarborough Shoal nga isa ka high-tide elevation nga nahamtang 120 nautical miles ang kalayuon halin sa Zambales kag sulod pa sa exclusive economic zone sang Pilipinas.
Ang pagbomba sang China sang tubig sa Philippine vessels sang Martes, Abril 30, ang ginpakamalaot sang madamo nga mga pungsod lakip na sang Estados Unidos sang Amerika.
Apang suno sa embahada sang China, sa nagligad nga isa ka tuig, ini man nga batch sang mga pungsod ang masami nga nagapagwa sang statements naangot sa maritime incidents sa tunga sang Pilipinas kag China. Dugang sang embahada, sa baylo nga maghambal sang matuod ini nga mga nasyon, may gina-apinan sila sa isyu.
Ginpahayag pa sini nga malapit 200 ang mga nasyon sa bilog nga kalibutan, kag ini nga batch sang mga pungsod nga nagakondena sang ila ginhimo ang wala naga-representar sang “international community.”
“Over the past one year, the same batch of countries issued statements on maritime incidents between China and the Philippines. Instead of speaking on the true merits of the matter, those statements were intended to take side. Against nearly 200 countries in the world, this batch of countries cannot represent the international community,” suno sa embassy.
Dugang pa sang embahada, ang balasulon amo ang Marcos administration bangud amo ini ang nagahimo sang tension — indi kaangay sa nagligad nga administrasyon nga maayo mag-uyat sa maritime dispute.
Ginsiling man sini nga ginalapas sang Pilipinas ang “Gentlemen’s Agreement, Internal Understanding and New Model” nga una na nga ginkasugtan sang duha ka mga pungsod.
Matandaan nga una na nagsiling si President Ferdinand Marcos Jr. nga wala sang ihibalo ang Malaca ang kun ano nga kasugtanan ang ginatumod sang China bangud wala man sang natabo nga agreement.
May ginaduso man nga mga resolution nga imbestigaran sa Kongreso ang alegasyon nga si anay President Rodrigo Duterte ang nagsulod sa “gentleman’s agreement” sa China nga amo ang ginahimo sang Beijing nga justification sa tion nga mag-atake sila sa mga barko sang Pilipinas.#
