Imbitaron ang Chinese Embassy kag si Vice Admiral Alberto Carlos sa hearing sang Senado nga amo ang maga-imbestigar sa ginaalegar nga recording sang ginapahayag “new model” arrangement sa tunga sang Pilipinas kag China.
Suno kay Senator Francis Tolentino, indi subpoena kundi isa ka matinahuron nga imbitasyon ang ginpadala sa Chinese Ambassador to the Philippines amo man sa Consul General of China.
Pahayag ni Tolentino, indi pwede mapwersa ang Chinese Embassy in Manila nga atubangon ang imbestigasyon bangud sa diplomatic protocols kag international law. Apang suno sa senador, mahimo gid makapasaka sang kaso batok sa diplomats kun mapamatud-an nga nagalapas sila sa layi sang pungsod. Posible suno kay Tolentino ang expulsion, declaration sang persona non grata, reduction sa size sang embassy personnel, non-renewal sang visa sang administrative personnel, kag iban pa.
Matandaan nga si Tolentino ang nagduso sang Senate Resolution 1023 kun sa diin nagpanawagan sa Senate national defense committee nga maglunsar sang imbestigasyon sa gina-alegar nga wiretapping sa phone conversation sa tunga sang Chinese side kag isa ka opisyal sang Armed Forces of the Philippines Western Command (WESCOM).
Natabo ini sang Enero 2024 kun sa diin ginaalegar nga naistoryahan ang “new model” agreement sa West Philippine Sea.
Si Carlos amo anay ang chief sang amo nga talatapan apang ginbuslan na siya ni Rear Admiral Alfonso Torres Jr. bilang WESCOM commander subong nga Mayo matapos nga nag-file ini sang leave of absence bangud sa personal nga mga rason.
Mangin ang National Bureau of Investigation (NBI) ang naga-imbestigar na suno kay Tolentino sa mga personalidad nga involved sa ginaalegar nga wiretapping.
Naka-schedule ini nga hearing sa Myerkules magluwas lamang kun i-postpone sang Senate national defense panel.#
