Ginapatihan nga ginhungod gid ang pagpanghalit sa Bajo de Masinloc ukon sa Scarborough Shoal sa West Philippine Sea agud nga wala na sang balik-balikan ang mga Pinoy na manugpangisda.
Ginpakigbahin ini sang Bureau of Fisheries and Aquatic Resources (BFAR) kadungan sang pagsapubliko sang report nga kadungan sang ila nga deployments sa Bajo de Masinloc, nadiskubrehan nga tuman ka daku ang halit sa lagoon.
Ang ginatudlo nga posible nga rason amo ang cyanide fishing nga ginahimo sang mga manugpangisda nga Chinese kag Vietnamese.
“At sinasabi, according to Filipino fishermen, ‘yung mga Chinese fishermen, if I am not mistaken, ay gumagamit ng cyanide as well ang mga Vietnamese fishers,” suno kay Bureau of Fisheries and Aquatic Resources spokesperson Nazario Briguera.
Dugang sini, isa ini ka kaso sang illegal fishing kag maathag nga paglapas sa layi partikular sa United Nations Convention on the Law of the Sea.
Ginpahayag man nga ang paggamit sang cyanide ang posible nga rason kun ngaa magamay ang mga isda sa Bajo de Masinloc.
Ginsiling man ni Briguera nga indi lamang ang marine integrity sang Pilipinas ang nagaka-kompromiso bangud sa gingamit nga cyanide kundi ang iya sang iban nga mga pungsod.
“Kasi magkakarugtong po ang ating karagatan, hindi ibig sabihin po niyan ka [kapag] may pagkasira sa Bajo de Masinloc ay walang epekto iyan sa ibang bahagi ng ating karagatan,” pahayag sini.
Binilyon ka pesos ang ginbilin nga halit sini sa mga corals suno pa sa bureau.
Ginatugyan naman sang BFAR kag sang Philippine Coast Guard (PCG) sa Department of Justice (DOJ) kun may complaint nga ipasaka batok sa China.
Sang Septyembre sang nagligad nga tuig, matandaan nga nagpahayag ang Office of the Solicitor General nga gina-konsiderar sini ang pagpasaka sang bag-o nga complaint batok sa China sa Permanent Court of Arbitration bangud sa nakit-an nga mga halit sa mga korales sa West Philippine Sea.#
(Photo: AFP)
