Ginpintahan lang ang mga Chinese maritime militia vessels nga nakit-an sa palibot sang Bajo de Masinloc sa West Philippine Sea agud magguwa nga pareho ang itsura sini sa mga barko sang China Coast Guard.
Ginalantaw nga ginbulos lang ini nga fishing militia ships apang kun lantawon sang maayo, kulang ini sa sophisticated navigation kag surveillance equipment kag wala sang markings nga iya sang Coast Guard sang China.
Pahayag ni PCG Spokesperson for the West Philippine Sea Commodore Jay Tarriela, posible nga ginagamit nga maritime militia bilang bulos kun wala ang presensya sang China Coast Guard agud maghimo sang ila katungdanan.
Ang mga moderno kag mas madasig naman nga mga barko sang China ang ginpahayag nga nagapuwesto sa guwa sang shoal.
Suno kay Tarriela, ginatun-an pa sang Pilipinas kun ngaa may amo sini nga adjustments nga ginhimo ang China.
Sa report pa sang PCG, apat ka Filipino fishing boats ang nagapabilin malapit sa Bajo de Masinloc, samtang ginsiling naman sang Armed Forces of the Philippines nga wala sang pagbag-o sa kadamuon sang Chinese maritime militia vessels nga nagabantay sa disputed area.
55 ini ka Chinese vessels nga na-monitor sa Bajo de Masinloc, Ayungin Shoal, Pag-Asa, Panata kag Lawak kun sa diin ang iban ang nagapundo samtang nagapatrolya naman ang iban.
Natigayon man nga naka-resupply ang Philippine Navy sa walo ka outposts sang Pilipinas sa Kalayaan Islands kag nagaplano para sa masunod nga resupply mission sa BRP Sierra Madre sa Ayungin Shoal.
Ginkumpirma naman sang PCG nga ang BRP Gabriela Silang kag BRP Ventura ang magabalik halin sa iya nga hydrographic mission sa West Philippine Sea pakadto sa Bolinao, Pangasinan matapos nga gin-sunod-sunod sila sang duha ka CCG vessels.#
