Gin-ako na sang Chinese national nga na-aresto sa Taguig City nga siya ang nagapanag-iya sang high-powered firearms nga nakuha sang otoridad sa iya gina-rentahan nga lugar sa exclusive subdivision sa amo nga syudad.
Ang amo nga suspek kag ang iya kaupod nga isa ma ka Chinese national ang napaidalom na sa inquest proceedings sa kaso nga illegal possession of firearms kag ammunition kag corruption sang public officials.
Matandaan nga una na nga ginpanginwala sini nga iya ang indi rehistrado nga mga pusil, apang ginbawi niya ini nga statement kag ginsiling nga nagahampang siya sa shooting range.
Dugang pa sini, may Chinese siya nga abyan nga nag-swap sang isa ka motor kag ang ginhatag sa iya amo ang pusil.
Apang pahayag sang National Capital Region Police Office, magapatigayon sila sang mas madalom nga imbestigasyon sa amo nga kaso ilabi na bangud lain-lain nga pangalan kag alias ang ginahatag sang suspek kag lain man ang pangalan nga iya ginagamit.
Nadiskubrehan man sang pulis kag sang Bureau of Customs nga ang McLaren sportscar nga nakit-an sa townhouse ang ginbayaran lamang sang Chinese sang P4-million para sa buwis sa baylo nga P10-million.
Ang kaupod sang suspek nga nagtuyo nga i-bribe ang pulis sang P3-million para sa iya kahilwayan ang yara na subong sa kustodiya sang otoridad.
Lakip sa busision sang pulis amo ang source sang tuman ka daku nga kuwarta, luxury cars, high-powered firearms, kag mga bala.
Matandaan nga sa pag-raid sang pulis sang Abril 14, may nakit-an man sa ginaistaran sang suspek nga helmets nga may tinaga nga “China”, may tactical vest, kag may yara man sang Chinese flag.
Ang isa pa ka kaupod nga Chinese nga si Jerry Mari Cheng amo ang nagkadto sa Regional Special Operations Group agud magdala sang P3 million agud ipangbayad para paguwaon ang suspek, apang nakapalagyo ini kag subong gina-ayam man sang kapulisan.
Sa inisyal nga imbestigasyon, ang mga arestado ang naangot sa Philippine offshore gaming operators (POGOs) apang padayon pa ang pagpakig-angot sa Chinese embassy agud makakuha sang dugang nga impormasyon.
