ILOILO CITY-Gin-athag sang Commission on Human Rights Region 6 nga mahimo sila magpatigayon sang imbestigasyon kasunod sang open statement nga ginpagwa sang Bayan Panay nga nagahingyo sa ahensya nga imbestigaran ang ginaalegar nga overkill sa lima ka mga rebelde nga napatay sa encounter sa Aglonok, Calinog, Iloilo.
Sa interview sang Bombo Radyo kay Atty. Jonnie Dabuco, Regional Director sang Commission on Human Rights Region 6, iya ginpahayag nga may yara sila sang moto proprio power agud magpatigayon sang kaugalingon nga pagpangusisa.
Ang motu proprio amo nga official nga tikang bisan wala sang formal request halin sa isa ka Partido bangud man nga wala pa nabaton sang ahensya ang official notice halin sa Bayan Panay.
Suno kay Dabuco, kun may yara sang alegasyon sang paglapas sa tawhanon nga kinamatarung, mas maayo man nga may yara sang mapresentar nga mga ebidensya kaangay sang resulta sang autopsy ukon forensic investigation magluwas pa sa mga indibidwal nga mahimo magtindog nga eye witnesses.
Dugang niya, kun kinahanglan i-file ang kaso, magabulig sila sa pag-facilitate agud i-refer ini sa prosecutor ukon sa Ombudsman.
