Nakabawi na ang Portugal paagi sa paglutos sa Uzbekistan, 5-0, kasunod sang imbukada nga group match sa FIFA World Cup 2026 nga nag-resulta sa 1-1 draw batok sa Democratic Republic of the Congo.
Nanguna sa European team sa Group K ang ila captain kag football superstar nga si Christiano Ronaldo nga naka-brace ukon duha ka goals sa ika-anum kag ika-39 nga minuto.
Sa edad nga 41-anyos, nakahimo sang record si CR7 bilang una nga player nga naka-score sa anum ka World Cups.
Nahimo niya ang brace subong nga adlaw matapos ang dalayawon nga performance sang tatlo ka iban pa nga superstars kahapon nga sanday Lionel Messi sang Argentina, Kylian Mbappe sang France, kag Erling Haaland sang Norway nga lunsay naka-duha ka goals sa ila tagsa ka hampang.
Magluwas sa Portuguese captain, naka-goal man para sa team sanday Nuno Mendes sa 17th minute kag si Rafael Leao sa 87th minute.
Naka-goal man ang isa ka player sang Uzbekistan nga si Abduvohid Nematov sa 60th minute apang gin-isip ini para sa Portugal bangud “own goal” ukon nagsulod ang bola sa ila kaugalingon nga net.
Ginpatigayon ang hampang sa Houston, Texas umpisa 1:00 a.m. (Philippine Time) kag nagtakop alas tres subong nga kaagahon.
Sunod nga atubangon sang Portugal ang Colombia sa Miami para sa katapusan nga group match, samtang makasambuwa naman sang Uzbekistan ang Congo sa Atlanta.#
