ILOILO CITY – Nagpasar sang resolution ang Iloilo City Council nga nagahingyo sa Land Transportation and Franchising and Regulatory Board (LTFRB) kag sa Land Transportation Office (LTO) nga ipaiway anay ang pagpanakop sa mga drivers kag pasahero sa syudad sang Iloilo nga wala nagasuksok sang face shield.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Transportation sa Iloilo City Council, iya ginpahayag nga ini ang lihok sang konseho bilang bulig sa mga driver nga indi man matam-an sa kaso nga Reckless Driving.
Mabug-at ang penalidad suno kay Duron kag sa pagkamatuod, ang indi pagsuksok sang face shield ang paglapas sa health protocol kag indi isa ka moving traffic violation.
Suno kay Duron, santo sa pahayag ni Dr. Roland Jay Fortuna nga amo ang nangin resource person sa pagsinapol sa Iloilo City Council kaina sang aga, “recommendatory” lang ang pagsuksok sang face shield apang wala pa sang ginpahayag ang Inter-Agency Task Force nga mandatory na ini.
Sa amo man nga resolution, ginahingyo sang City Council ang duha ka talatapan nga itugyan sa Iloilo City Government paagi sa PSTMO kag sa barangay officials ang pagpatuman sang nasambit nga pagsulundan.
Suno kay Duron, dal-on sang mga konsehal ang amo nga resolution sa ila dialogue sa duha ka talatapan.
“FACE MASK IS A MUST, FACE SHIELD IS ENCOURAGED” — ESTANTE
Samtang, ginpatpat naman ni Iloilo City Councilor Ely Estante ang natabo sa first reading sa Iloilo City Council may kaangtanan sa iya ginaduso nga mandatory nga pagsuksok sang face shield sa tanan nga pampubliko nga lugar sa syudad sang Iloilo.
Sa interview sang Bombo Radyo kay Estante, iya ginpahayag nga nangin resource person sa konseho si Dr. Roland Jay Fortuna.
Sa pagsinapol suno kay Estante, gin-athag ni Dr. Fortuna nga santo sa pahayag sang World Health Organization, mandatory ang pagsuksok sang face mask samtang “gina-engganyo” naman ang pagsuksok sang face shield bilang proteksyon sa mata nga isa man ka mode of transmission sang virus.
Bangud sini, may yara sang iban nga konsehal nga nagpanugyan nga sa baylo nga face shield, mahimo man gamiton ang bisan ano nga eye protector kaangay sang goggles.
Sa bahin ni Estante, ginduso niya sa gihapon ang mandatory nga pagsuksok sang face shield bangud ini suno sa iya ang diskusyunan pa sang COVID-19 team sang Iloilo City Government.
