ILOILO CITY – Ginalauman nga mangin mas maayo ang ‘attendance, productivity, kag morale’ sang mga regular nga empleyado sa Iloilo City Government bangud sang pagpatuman sang Flexi Time ukon flexible work schedule.
Ini matapos nga ginpagwa ang Memorandum Order No. 2020-062 nga napetsahan sang Pebrero 17 nga nagapahanugot sa mga empleyado nga maatrasar sang kutob 30 minutos sa aga — buot silingon mahimo sila nga makasulod tubtob ‘las 8:30 sa aga — kag i-compensate ukon bawion lang ang ila trabaho sa hapon paagi sa pag-time out sang ‘las-5:30 sa hapon.
Sa interview sang Bombo Radyo kay Iloilo City Mayor Jerry Treñas, iya ginpahayag nga gin-approve niya ang 30 minutos nga time allowance bangud naintindihan niya ang sitwasyon sang mga ginikanan nga masako man sa ila panimalay bag-o ang ila trabaho sa opisina.
Suno kay Treñas, ang mga iloy pa ang nagahimos sang pagkaon kag iban nga kinahanglanon sang ila mga anak kun sila ang mag-eskwela samtang masami naman nga nagadul-ong pa ang amay sa iya anak sa eskwelahan.
Gin-athag ni Treñas nga ini ang benepisyo lang para sa mga regular nga empleyado kag indi para sa mga job hires.
