Maga-umpisa na sa paglayag ang 100 ka mga sakayan subong nga adlaw pakadto sa Panatag ukon Scarborough Shoal sa West Philippine Sea bilang dramatisasyon sang determinasyon ang mga Pilipino nga depensahan ang soberanya sang Pilipinas.
Suno sa Atin Ito Coalition nga amo ang organizers sang nasambit nga civilian mission, dayunon nila ang aktibidad apisar pa may yara sang na-report nga nagpadala ang China sang daku nga pwersa nga magabalabag sa mga sakayan halin sa Pilipinas.
Suno kay Rafaela David, co-convenor sang coalition kag presidente sang Akbayan, mangin malinong ng ila nga paglayag kag indi sila malingkang sa sini nga pwersa sang China.
Ini na ang ikaduha nga civilian mission sa West Philippine Sea nga nagatuyo nga maka-conduct sang “peace and solidarity regatta” kag maga-butang man sang markers ukon boya sa Scarborough Shoal ukon kilala sa lokal nga Bajo de Masinloc.
Kahapon, Mayo 13, sang nagpahibalo ang maritime expert nga si US Air Force official kag ex-Defence Attaché Ray Powell nga apat ka coast guard kag 26 ka dalagku nga maritime militia ships ang ipadala sang China.
Nagsabat naman si Philippine Coast Guard (PCG) spokesperson for the West Philippine Sea Commodore Jay Tarriela nga ang report ni Powell ang isa ka “safe forecast.”
Ginpasiguro naman sang PCG ang safety sang mga participants sa sini nga civilian mission sa tunga sang presensya sang Chinese vessels.
Naghingyo naman si National Security Council (NSC) Assistant Director General Jonathan Malaya sa China nga respetuhon ang civilian mission. Suno kay Malaya, indi nga byahe ang indi konektado sa gobyerno sang Pilipinas bangud mga sibilyan ang nagmato-mato sa pag-organisar sini.
Nahibaluan nga ang Bajo de Masinloc ang isa man ka lugar nga masami ginaluntaran sang tension sa tunga sang China kag Pilipinas.
Ang pinakaulihi diri amo ang natabo sang nagligad lamang nga Abril nga ginbombahan sang water cannon sang China Coast Guard ang Philippine vessels nga pakadto sa amo nga teritoryo.
