Gin-anunsyo sang Commission on Elections (Comelec) nga exempted ang P20 per kilo Rice Project sang Department of Agriculture (DA) sa 45-day election spending ban.
Paagi sa Comelec Memorandum No. 25-07984, ginpaboran sang poll body ang hingyo sang DA nga indi pag-i-lakip ang amo nga programa sa dumilian samtang nagahilapit ang 2025 midterm elections.
Buot silingon sini, may certificate of exemption nga nagakahulugan nga wala nalakip ang programa sa imbestigaran kun may paglapas ini sa Section 261 (v) (1) sang Omnibus Election Code (OEC).
P5-billion nga pondo ang nakapain para sa amo nga programa nga nagabaligya sang bugas sa presyo nga P20 per kilo.
Suno kay Comelec chairman George Erwin Garcia, ginlakip sang poll body ang dugang nga guidelines para sa exclusion, lakip na ang pagpasa sang local government units (LGUs) sang separado nga certificates of exemption kun magbaligya sila sang bugas sa mas barato pa gid nga presyo.
Ang iban pa nga direktiba amo nga dapat ibaligya ang subsidized rice sa public places, kag dapat nga tugutan ang media, civil society kag interest groups nga magkadto sa venue kun may implementasyon na.
Kun matandaan, gin-exempt man sang Comelec sa spending ban ang mga programa sang Department of Social Welfare and Development (DSWD) lakip na ang kontrobersyal nga Ayuda para sa Kapos ang Kita Program.
Exempted man ang infrastructure projects halin sa December 2024.
Nahibaluan nga sa idalom sang Comelec Resolution No. 11060, kinahanglan ang certificate of exemption agud mag-implementar sang mga programa kag aktibidad sa social welfare projects kag services kun ginaimplementar ang public spending ban halin sa March 28 tubtub sa May 11, 2025.
