ILOILO CITY – Ginatutukan sang Iloilo City Commission on Elections ang listahan sang mga flying voters ukon mga botante nga nagsaylo sang ilistaran kag napasalawan nga mag-file sang application for cancellation ukon transfer sa palaabuton nga 2023 Barangay and Sangguniang Kabataan Elections sa Oktubre 30.
As of November 11, 2021, may yara sang kabugusan nga 330, 470 ka mga registered voters sa Iloilo City.
Sa interview sang Bombo Radyo kay Mr. Jonathan Sayno, Election Assistant II sang Iloilo City Commmission on Elections Office, iya ginpahayag nga pinaagi sang moderno nga teknolohiya nga ginatawag nga Automated Fingerprint Identification System nga isa ka high speed, high-capacity image processing system nga naga-enhance sang fingerprint sang mga botante, mahimo na nga matukiban ang identity sang mga ini batok sa mga flying voters.
Suno kay Sayno, may yara sang listahan ang opisina sang mga indibidwal nga indi makaboto nga may problema sa registration records sa ginpatigayon nga cross matching.
Ginpaathag sang natungdan nga antes marehistro ang botante, nagaagi ini anay sa interview kag ginasugid ang intensyon sa pagparehistro ukon pag-transfer sang registration residence.
Nahibaluan nga nagtakop na sang Enero 12, 2023 ang registration period.
Nagpasalig naman si Sayno nga wala sang dapat kabalak-an ang mga botante bangud napreparahan na sang Iloilo City Commission on Elections ang mga tikang agud indi makaboto ang mga flying voters.
