Puno sang bugal nga gindala sang delegasyon sang Western Visayas ang pangalan sang rehiyon sa opening ceremony sang 66th Palarong Pambansa sa Datu Lipus Makapandong–Gov. D.O. Plaza Sports Complex sa Patin-ay, Prosperidad, Agusan del Sur.
Sa Saludo performance ukon ang entrada sang mga delegasyon, ginpakilala ang Region VI nga isa sa “most vibrant and culturally rich regions” sa bilog nga Pilipinas. Ginhinambit man nga bantog ini sa Pilipinas bangud sa strong heritage, dynamic economy, kag warm hospitality.
Namensyonar man ang world-famous destination nga Boracay Island sa Aklan kag ang maudagon nga mga kapistahan kaangay sang Dinagyang Festival sang Iloilo City.
“The reigning champions proudly parade and deliver a powerful Saludo performance during the Opening Ceremony of the 66th Palarong Pambansa. With pride, passion, and powerhouse energy, The Champs sets the tone for an unforgettable celebration of athletic excellence and regional pride,” kabahin sang post sang Department of Education (DepEd) Region VI.
Nauna na nga ginpahayag sang DepEd Region VI nga target sini nga mapabilin ukon mapataas pa ang ranggo sang rehiyon subong nga tuig.
Nagpangatlo ang Western Visayas sang 2025 nga may 44 gold, 54 silver, kag 58 bronze medals — sunod sa perennial powerhouse nga National Capital Region (NCR) kag second placer nga CALABARZON (Region IV-A).
Bilang kabahin sang preparasyon, mismo si DepEd Regional Director-Western Visayas Cristito Eco kag ang mga myembro sang management committee ang nagkadto sa Agusan del Sur sang katapusan nga semana sang Marso kag temprano nga bahin sang Abril.
Gin-check nila ang billeting school, ang kalayuon sini sa venue sang mga hinampang, ang pagbyahe sang mga atleta halin sa Iloilo pakadto sa Agusan, kag ang iban pa nga kinahanglanon.Probinsya ng Iloilo
Isa sa mga pagpanghangkat nga atubangon sang Western Visayas amo nga indi na sini makaupod ang Negros Occidental sa labing-una nga tion sa Palarong Pambansa bangud maga-compete na ini sa idalom sang Negros Island Region.#
