Napalpak ang handom ni Sen. Chiz Escudero nga maeilihir liwat bilang Senate president matapos nga gin-reject gilayon sang 11-member group ang iya tanyag.
Suno kay Senator Francis “Kiko” Pangilinan, may yara sang nangin mga diskusyon apang gilayon ini nga ginbasura sang minority bloc.
Ang minority bloc, nga ginatawag ang ila kaugalingon sa Solid Block 11, ang nagasuporta kay Sen. Sherwin Gatchalian para sa pagka- Senate president.
Ang tanyag agud himuon si Escudero bilang bag-o nga Senate president kabaylo sang iya pagsaylo sa bag-o nga minority ang ginhimo sang lain nga mga intermediaries apang wala ini gindetalye ni Pangilinan.
Matandaan nga nangin mainit ang istorya sang pag-ilis sa liderato sang senado matapos ang pagpungko ni Senate President Alan Peter Cayetano sang Mayo 11, matapos nagboto ang 13 ka mga 13 senador nga kalabanan nga kaalyado ni Duterte, agud pahalinon si anay Senate President Tito Sotto III.
Suno kay Pangilinan, si Sotto ang nag-propose kay Gatchalian bilang compromise candidate.
May kaangtanan naman sa posibilidad nga ila pangaluyagan sanday Senators Mark Villar kag Camille Villar agud magtipyok gikan sa bag-o nga majority bloc, namalibad si Pangilinan nga magdetalye apang ginkumpirma nga may yara sa ginapatigayon nga mga pag-istoryahanay..
Gindugang naman ni Pangilinan nga ang pressure halin sa publiko ang mahimo magtulod sa majority senators agud magpaminsar ilabi na nga madamo nga mga student councils sa mga unibersidad ang nagapanawagan sa pag-resign ni Cayetano.
