Natumod na sang Commision on Election (COMELEC) Iloilo City ang mga designated areas nga mahimo plastaran sang mga kandidato sang ila campaign posters para sa 2025 midterm elections.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga nagsugod na sila sang pagpangmarka sa mga plaza sang kaina sang aga.
Ini ang ginalakipan sang:
Molo, Arevalo, Mandurriao, Jaro, La Paz, Bo. Obrero kag Plaza Libertad.
Suno kay Sayno, ini ang preparasyon man sa campaign period sang mga kandidato sa nasyonal nga magasugod sa Pebrero 11, 2025, samtang Marso 28, 2025 naman ang sa bahin sang local elective positions.
Nagpaandam man ang natungdan nga ang sin-o man nga kandidato ukon party-list nga magtakod sa indi designated areas ang pagpangbaklason sang COMELEC.
Mahimo naman nga pasakaan sang kaso nga paglapas sa Republic Act 9006 ukon Fair Elections Act ang mismo maaktohan nga nagapangtakod sang campaign materials sa indi designated nga lugar.
