ILOILO CITY – Nagalaum si Iloilo 3rd District Board Member Matt Palabrica nga mapadasig na sang Committee on Economic Affairs and Investment nga ginauyatan ni 3rd District Board Member Jason Gonzales ang pag-schedule sang committee hearing angot sa resolution nga ginfile ni Palabrica mga nagaduso sang pagpatigayon sang komprehensibo nga inspeksyon kag imbentaryo sa tanan nga warehouses sang kalamay sa probinsya.
Ini sa tunga sang isyu may kaangtanan sa ginakulang nga suplay sang kalamay.
Sa interview sang Bombo Radyo kay Palabrica, iya ginpahayag nga posible nga sa masunod nga Martes, may commitment na si Gonzales kun san-o patigayunon ang hearing nga magaimbitar sang opisyal sang Sugar Regulatory Administration (SRA), Department of Trade and Industry (DTI) kag Department of Agriculture (DA), managers sang sugar mills, kag mga negosyante nga involved sa trading sa kalamay.
Nahibaluan nga nagpangabay si Majority Floor Leader Board Member Domingo Oso Jr. nga hatagan sang dako nga importansya ang amo nga hearing bangud national concern ang isyu sa sugar supply.
Matandaan nga gin-refer sa committees on Agriculture, Economic Affairs and Investment kag Peace and Order and Public Safety sa Sangguniang Panlalawigan ang resolution nga gin-file ni Palabrica.
Una na nga ginpahayag ni Presidente Ferdinand Marcos jr. nga posible mag-import sang 150,000 metric tons nga kalamay ang pungsod bangud posible nga maubos na ang sugar supply sa Pilipinas pag-abot sang Oktubre.
