ILOILO CITY – Magaimbitar ang Iloilo City Council sang mga eksperto sa marine life kadungan sang committee hearing may kaangtanan sa kontrobersyal nga crane way ukon ginpangtampok nga duta kag bato sa Dungon Creek.
Ini nga crane way ang kabahin sang ginatukod nga P70 million-worth foot bridge project sa Esplanade 3 sa syudad sang Iloilo.
Sa interview sang Bombo Radyo kay Councilor Ely Estante, chairman sang Committee on Environment kag Infrastructure sa konseho, iya ginpahayag nga bwas na, Abril 16, ang pagsinapol, las 2:00 sa hapon nga paga-updan sang mga tiglawas halin sa Department of Environment and Natural Resources (DENR), Department of Public Works and Highways (DPWH), kag Bureau of Fisheries and Aquatic Resources (BFAR).
Ginapaabot man nga makatambong kag makapaathag may kaangtanan sa epekto sang proyekto sa biodiversity sang Iloilo River si Dr. Rex Sadaba, marine biologist kag faculty member sa Biological Sciences Division sa University of the Philippines-Miagao.
Kaina sang udto sang personal nga nagpadulong si Estante sa Dungon Creek agud magpatigayon sang ocular inspection.
Una na nga nagpahayag si Estante nga nahangpan niya nga dako ang mabulig sang footbridge sa beautification sang syudad apang kon nagahalit ini sa dunang manggad, indi dapat ini pag-itolerar.
