ILOILO CITY- Nagapakig-angot na sa mga eksperto ang Committee on Infrastructure sang Sangguniang Panlalawigan agud mahatagan kasanagan ang isyu angot sa Ungka flyover.
Ini kasunod sang reklamo sang mga motorista bangud sa naobserbahan nga vertical displacement nga nagresulta sa pagkwestiyon sang publiko sa structural integrity sang amo nga proyekto.
Sa interview sang Bombo Radyo kay Iloilo 4th District Board Member Rolando Distura, chairman sang nasambit nga kumitiba, iya ginpahayag nga bangud sakop man sang probinsya ang area nga nahamtangan sang struktura, nagakadapat lang nga hatagan ini sang igtalupangod sang provincial government.
Suno kay Distura, kun kinahanglan, magapatawag ini sang committee hearing upod sa mga eksperto agud mapaathag ang teknikal nga aspeto sang flyover.
Sa subong suno sa board member, bangud bag-o pa lang ang proyekto, ginatugyan niya sa Department of Public of Public Works and Highways ang paghatag solusyon sa amo nga vertical displacement.
Nahibaluan nga temporaryo nga ginpasirado sa motorista ang flyover.
