Ginaduso sang Committee on Social Services sang Iloilo City Council ang mga ginikanan nga hatagan sang importansya ang ila responsibilidad sa ila tagsa ka kabataan.
Ini kasunod man sang pagkadula sang duha ka mga bata sa Baldoza, La Paz, Iloilo City.
Sa interview sang Bombo Radyo kay Iloilo Councilor Alan Zaldivar, chairman sang Committee on Social Services, iya ginpahayag nga sang nabatian nila ang amo nga balita, ginkasubo gid ini nila.
Suno kay Zaldivar, kinahanglan nga bisan ano ka busy ang isa ka ginikanan, nagakadapat nga ginasekyar ang ila kabataan ilabi na ang mga menor-de-edad.
Gintumod man sini nga mas pabaskugon sang syudad ang pag-edukar sa mga ginikanan sa aspeto sang ila responsibilidad bilang isa ka nanay kag tatay.
Nagpakig-angot naman ang komitiba sa Iloilo City Social Welfare and Development Office (CSWDO) agud nga mas mapasangkad ang ila programa nga ‘Parents Effectiveness Program’ nga naga-address sa mga concerns sang ginikanan.
