Ano ang imo routine para malab-ot ang imo ideal weight?
Masami nga nagaka-inspire gid kita sa weight-loss journey sang iban nga tawo kag ang disiplina nila sa kaugalingon agud nga mangin fit ukon mabuhinan ang kabug-aton sang lawas.
Sa Guangzhou, Guangdong Province, China, may isa ka babaye ang agaw-atensyon gid bangud man sa content sini nga ginapakita para man mapabilin ang iya bug-at ukon mas magmag-an pa gid gani.
Ini amo si Ting Zi Baobao ukon mas kilala nga si Baby Tingzi.
Amo lang ina ugaling… madamo gid ang nagamuno sa iya bangud sa edad nga beintehon na kag may kataason nga five feet kag two inches, yara lamang sa 25 kilos ang iya bug-at.
Tuman ini kalayo sa ideal weight bangud kun basehan ang body mass index calculation, ang ideal kuntani nga bug-at para sa iya kataason amo ang 44.9 to 54.9 kilos.
Masami pa nga nagasaot si Tingzi sa iya videos kag masami man nagasuksok sang revealing nga mga bayo. Makit-an gid kun ano ka niwang ang mga tiil sini kag kamot.
Nakibot pa gid ang iya viewers sang ginsiling ni Tingzi nga gusto pa gid sini nga mabuhinan ang iya bug-at.
Apisar may mga nagakadlaw sa iya, may yara naman sang nagpahayag sang ila concern kag nagtugda nga dapat magpangayo na si Tingzi sang urgent medical help bangud basi kun may yara ini sang anorexia nervosa.
Ang anorexia amo ang eating disorder kun sa diin ang tawo nga may amo sini nga condition ang nahadlok gid nga magtambok.
Kadam-an sang may mga amo sini nga kondisyon ang sobra-sobra gid kun mag-ehersisyo kag todo ang pag-limit sa ila pagkaon para indi madugangan ang ila bug-at sa lawas.
