Ginatudlo sang militar ang rebelde nga grupo nga amo ang yara sa likod sang pagpangluthang-patay sa punong barangay sang Roosevelt, Tapaz, Capiz.
Sa interview sang Bombo Radyo kay Major Cenon Pancito III, spokesperson sang 3rd Infantry Division sang Philippine Army, iya ginpahayag nga ally ukon kaalyado sang Philippine Army ang 49-anyos nga biktima nga si Punong Barangay Julie Catamin.
Pahayag ni Pancito, napatay si Catamin 8:30 sang aga sang Domingo, Pebrero 28, kag pagka-9:00 sa aga, gilayon nga nagpagwa sang statement ang mga ‘allied media warriors’ sang CPP-NPA ukon Communist Party of the Philippines – New People’s Army nga nagatudlo sa militar nga amo ang responsable sa krimen.
Ginpahayag pa ni Pancito nga ginpagwa sang mga kaalyado sang rebelde nga gindala sa Calinog District Hospital si Catamin, apang sa pagkamatuod, sa amo nga oras, nagahamyangon pa si Catamin sa dalan sa Malitbog Centro, Calinog, Iloilo.
Bangud sini suno kay Pancito, nagagwa nga premeditated ukon templated ang amo nga statement sang rebelde.
Magluwas diri, indi matuod suno kay Pancito nga may taga-Criminal Investigation and Detection Group (CIDG) nga nagbalik-balik sa balay ni Catamin antes natabo ang krimen.
Ginpahayag pa ni Pancito nga madugay na nga abyan sang militar kag sang pulis si Catamin kag bisan natabo ang kontrobersyal nga Disyembre 30 nga police operation sa Tapaz, Capiz, wala nagbag-o ang relasyon ni Catamin sa gobyerno.
Sa official statement ni MGen Eric Vinoya, Commander sang 3rd Infantry (Spearhead) Division sang Philippine Army, ginpakamalaot man ang CPP-NPA kag amo ang ginatudlo mayor nga utok sa likod sang krimen.
