ILOILO CITY- Wala sa gihapon na- surrender sang Creative Smart Ideas Events and Marketing Company nga amo ang organizer sang kontrobersyal nga Juan Ride 2023 nga ginpatigayon sa Iloilo sa Department of Social Welfare and Development ang ila solicitation permit apisar nga nag-expire na ini sang Disyembre 7.
Sa interview sang Bombo Radyo kay Lailanie Madriaga, Head sang Standards Section sang Department of Social Welfare and Development Region 6, iya ginpahayag nga may ihatag pa nga extension ang ahensya para sa kompaniya agud i-surrender ang expired nga permit apang sa tion nga mapaslawan, ang legal service department na sang ahensya ang magauyat.
Suno kay Madriaga, sa subong, ila i-exhaust ang mga posibilidad nga mag- comply ang Creative Smart Ideas Events and Marketing Company.
Gin-athag naman ni Madriaga nga na-isyuhan sang solicitation permit ang Creative Smart Ideas Events and Marketing Company bangud nga nangin compliant man ini sa tanan nga ginpangayo nga requirements sang ahensya.
Nahibaluan nga gin-gamit ang amo nga permit para sa pagtipon sang pondo sang kompaniya sa gin-organize sini nga Juan Ride 2023 kun sa diin ang 70% sang ila matipon nga kwarta ang magakadto sa mga youth programs sang Department of Social Welfare and Development.
Matandaan nga nangin kontrobersyal ang Juan Ride 2023 bangud sa ginaalegar ghost winners sa ila pa-raffle nga mga motorsiklo.
